СДСМ: Убиствата станаа секојдневие, Тошковски нема контрола над безбедноста

Ситуацијата со безбедноста во Македонија станува сè позагрижувачка, алармира Социјалдемократскиот сојуз на Македонија (СДСМ). Во своето последно соопштение, партијата остро ја критикува работата на Министерството за внатрешни работи и министерот Панче Тошковски, наведувајќи дека убиствата станале секојдневие, а полицијата ја изгубила контролата врз состојбата во земјата.

„Имаме убиства речиси секоја недела, и тоа пред очите на граѓаните, во најцентралните делови на градовите и маалата“, стои во соопштението на СДСМ. Партијата посебно го истакна последното убиство во Штип како само едно во низата шокантни инциденти кои се случуваат јавно, пред сведоци. Според СДСМ, граѓаните се чувствуваат небезбедно дури и кога излегуваат во кафе-барови или ресторани.

Во Скопје, за помалку од една година, се случија неколку убиства на јавни места, како во Мавровка, Бит Пазар, Чаир и Шуто Оризари. Освен тоа, регистриран е значителен раст на разбојништва, кражби, престрелки со огнено оружје, а во два случаи беа фрлени и бомби во дворови на граѓани. СДСМ потсетува и на инцидентот во полициската станица Бит Пазар, каде што исто така се случи убиство.

Партијата смета дека овие податоци јасно покажуваат дека МВР и министерот Тошковски ја немаат ситуацијата под контрола. „Уште колку убиства се потребни за министерот да сфати дека не може да ја води МВР како институција?“, прашуваат од СДСМ.

Од партијата бараат целосно расчистување на последниот случај и најавуваат дека ќе постават јавни прашања за кои очекуваат конкретни одговори. СДСМ апелира до надлежните институции да преземат итни мерки за зајакнување на безбедноста и враќање на чувството на сигурност кај граѓаните.