01 ноември 2025
• од Станча Јаќимовски
Во Бугарија оваа зима речиси 338.000 семејства ќе добијат државна помош за покривање на трошоците за греење, соопшти Министерството за труд и социјална политика. Тоа претставува зголемување од околу 13.000 семејства во споредба со минатата година, што покажува дека сè повеќе луѓе имаат потреба од поддршка поради зголемените животни трошоци.
Помошта се доделува за петмесечен период – од 1 ноември 2025 до 31 март 2026 година. Вкупниот износ за сезоната изнесува 606,70 бугарски лева (околу 310 евра), што е зголемување од близу 10% во споредба со претходната зима. Средствата ќе бидат исплаќани секој месец – од 15-ти до крајот на месецот што следи по донесувањето на одлуката за одобрување на барањето.
Право на оваа финансиска поддршка имаат лица и семејства со ниски приходи, чии просечни месечни приходи во последните шест месеци се пониски или еднакви на индивидуално утврдениот праг за добивање помош за греење.
Министерот за труд и социјална политика, Борислав Гуцанов, донесе и корекционен коефициент со кој се овозможува пензионерите да не бидат исклучени од програмата поради зголемувањето на пензиите од 1 јули оваа година.
Денес, 31 октомври, е последниот ден кога граѓаните со ниски приходи и припадниците на ранливите групи можат да поднесат барања во дирекциите за „Социјална помош“.
Ваквата државна мерка има за цел да ги ублажи последиците од економската криза и растечките цени на енергенсите, со што на илјадници бугарски семејства ќе им се овозможи полесно да ја поминат зимата.
Ненадминливи Понуди Дневно
4.8 (10276 рецензии)
Заштедете 152.00 ден

