Недела на Свети Јован Лествичник – Четвртата недела од Великиот пост

Денес, православните христијани ја одбележуваат Неделата на Свети Јован Лествичник, четвртата недела од Великиот пост. Оваа недела ја носи духовната порака на покајание, молитва и пост, инспирирана од животот и делото на светиот Јован, кој е познат како автор на духовното дело „Лествица“, симбол на воздигнувањето кон Бога.

Преподобниот Јован, родум Сириец, живеел во 6 век. Уште на 17 години го посветил својот живот на Бога, заминувајќи на Синајската гора. Таму минал 19 години во осамеништво, во молитва и строг пост. Подоцна, се преселил во синајската пустина Фола, каде продолжил со подвигот уште 40 години. Неговиот пост и молитва биле пример на духовно издигнување, а неговото покајание било исполнето со длабока скрушеност и солзи.

Како игумен на Синајскиот манастир, Свети Јован го напишал делото „Рајска лествица“ на барање на игуменот на манастирот Раита. Ова дело е духовен водич за христијаните кои се стремат кон совршенство и соединување со Бога. Делото претставува духовна метафора за лествицата што води кон рајот, симболизирајќи ги чекорите на духовното усовршување.

Свети Јован се упокоил на 80-годишна возраст, околу 606 година. Неговата духовна наследство останува вечна инспирација за православните верници.

Во оваа недела, Црквата ги потсетува верниците на важноста на молитвата и постот како средства за победа над духовните слабости и злото. Четвртата недела од Великиот пост е момент на духовно охрабрување за сите кои постат, најавувајќи ја радоста на претстојното Христово Воскресение.

Со молитвите на Свети Јован Лествичник, сите ние сме повикани да се искачуваме на лествицата на добродетелите и да се стремиме кон духовно совршенство.