Хаос со водата во Дојран: Граѓаните без трпение, бараат одговор од градоначалникот Тентов

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Хаос со водата во Дојран: Граѓаните без трпение, бараат одговор од градоначалникот Тентов

08 јуни 2026

• од Темелко Тошев

Во екот на подготовките за новата летна туристичка сезона и при нагло покачување на температурите, жителите на Дојран се соочуваат со сериозен комунален проблем – чести прекини во водоснабдувањето и драстично намален притисок во водоводната мрежа.

Револтот меѓу дојранчани расте од ден на ден. Преку пораки доставени до нашата редакција, граѓаните алармираат за состојбата и јавно бараат одговори и итни решенија од градоначалникот Илија Тентов, како и од надлежните комунални служби. Тие прашуваат зошто овој проблем континуирано се повторува и кои се конкретните мерки што се преземаат за негово решавање.

„До кога вака ќе биде во Дојран? Секој ден нема вода, а да не зборуваме за притисокот. На овие жештини, само сме на почеток, да се нема вода е очајно“, се наведува во една од пораките на револтираните граѓани.

Исклучувања без најава и страв за туристичката сезона

Според сведоштвата на жителите, водоснабдувањето било целосно прекинато во вечерните часови на 6 јуни. Проблемот продолжил и следниот ден, кога вода немало повеќе од два часа, при што граѓаните биле оставени во мрак, без никаква официјална информација или најава до кога ќе трае прекинот.

Ваквата ситуација отвора сериозни прашања за тоа дали локалната власт има јасен план за стабилизирање на системот. Ова е особено критично сега, кога Дојран влегува во шпицот на летната туристичка сезона и кога бројот на луѓе во општината (жители, викендаши и туристи) драстично се зголемува.

Инфраструктурата не го следи урбанистичкото темпо?

Граѓаните не го кријат сомнежот дека локалната инфраструктура едноставно не може да го издржи зголемениот притисок, но и неконтролираната урбанизација.

„Ако нема способност да се направи нешто околу водата, тогаш зошто давате дозволи за градба? Се надевам дека градоначалникот ќе ни се обрати нам, граѓаните, и ќе ни објасни зошто не се презема ништо“, стои во острата реакција до нашата редакција.

Повеќе од комунален проблем

Ова прашање одамна ја надминува рамката на обичен дефект или рутински комунален проблем. Станува збор за директен удар врз квалитетот на животот во една од најпознатите македонски туристички општини.

Во летните месеци, континуираното водоснабдување е основен предуслов за нормално функционирање на домаќинствата, но и прашање на опстанок за угостителските објекти и сместувачките капацитети. Доколку Дојран претендира да биде сериозна туристичка дестинација, локалната власт ќе мора итно да одговори на предизвикот – дали водоводната мрежа може да ја преживее оваа сезона или туристите и граѓаните ќе останат жедни покрај полно езеро?

Граѓаните го чекаат потегот на општината.