Битиќи: Нов ценовен удар со поскапи горива и поголем притисок врз граѓаните

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Битиќи: Нов ценовен удар со поскапи горива и поголем притисок врз граѓаните

10 март 2026

• од Станча Јаќимовски

Од полноќ граѓаните ќе се соочат со нов ценовен удар, со поскапи горива и дополнителен притисок врз секојдневниот живот. Цената на дизелот се зголемува на 85,50 денари за литар, додека бензините ќе се продаваат по 79,50 и 81,50 денари. Со тоа, нафтените деривати во просек поскапуваат за 14,27 проценти.

Ова поскапување директно ќе влијае врз транспортот и производството, а со тоа и врз сите останати трошоци во економијата. Во пракса, ваквите зголемувања најчесто се прелеваат во повисоки цени на производите и услугите што граѓаните секојдневно ги плаќаат.

Во пресрет на овој нов ценовен шок, власта се обиде да ја смири јавноста со податокот дека месечната инфлација во февруари, во споредба со јануари, изнесува само 0,2 проценти. Сепак, ваквиот статистички пресек не ја покажува целосната слика за реалните трошоци на живот.

Кога февруари 2026 година се споредува со истиот месец лани, трошоците на живот се повисоки за 2,9 проценти. Храната и безалкохолните пијалаци поскапеле за 3,9 проценти, а цените на мало за 1,6 проценти. Тоа значи дека животот веќе бил поскап и пред новото зголемување на цените на горивата, кое дополнително ќе го засили ценовниот притисок во наредниот период.

Најреалната слика за животниот стандард, според Битиќи, се гледа во трошоците што граѓаните ги плаќаат секојдневно. Синдикалната минимална кошница за февруари достигна 67.382 денари, што е за 969 денари повеќе во споредба со јануари. Само трошоците за храна и пијалоци се зголемиле од 24.211 на 25.156 денари.

Во исто време, минималната плата изнесува 24.379 денари, што значи дека за покривање на една синдикална минимална кошница се потребни околу 2,76 минимални плати. Дури и по најавеното зголемување на минималната плата во март на 26.046 денари, за покривање на истата кошница и понатаму ќе бидат потребни околу 2,59 минимални плати. Според Битиќи, тоа покажува дека основните животни трошоци растат побрзо од платите.

Тој посочува дека Владата се повикува на растот на БДП, но дека првите економски показатели за 2026 година не се охрабрувачки. Државниот завод за статистика објави раст на БДП од 3,8 проценти во четвртото тримесечје од 2025 година, но податоците за почетокот на 2026 година покажуваат негативни трендови.

Индустриското производство во јануари 2026 година бележи пад од 6,6 проценти на годишно ниво, преработувачката индустрија пад од 8 проценти, а извозот на стоки е намален за 8,27 проценти. Според него, овие бројки укажуваат на слабеење на реалниот сектор и дополнителен притисок врз економијата уште на самиот почеток на годината.

Битиќи оценува дека Владата нема јасна антиинфлациона стратегија, ниту сериозна политика за заштита на куповната моќ на граѓаните. Тој смета дека недостасува конкретен одговор на ценовните шокови и поцврста поддршка за работниците.

„Македонија не живее подобро затоа што статистиката изгледа попристојно. Македонија живее потешко затоа што Владата е економски пасивна, политички самозадоволна и социјално несензитивна“, оценува Битиќи.