Арсовска поднесе кривична пријава против Висар Ганиу за дивоградби

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Арсовска поднесе кривична пријава против Висар Ганиу за дивоградби

16 јули 2025

• од Станча Јаќимовски

Градоначалничката на Скопје, Данела Арсовска, денеска достави кривична пријава до Обвинителството за гонење организиран криминал и корупција (ОЈО ГОКК) против градоначалникот на Чаир, Висар Ганиу, и уште неколку вработени во општината, обвинувајќи ги за користење на фалсификувана деловодна книга во процесот на легализација на дивоградби.

Во пријавата се наведува дека општина Чаир одбивала барања за легализација на балкони или делови од наследени куќи што биле поднесени навремено, а потоа броевите од тие одбиени барања биле искористени во наводно фалсификувана деловодна книга за легализирање на нови дивоградби и високи објекти изградени по истекот на законскиот рок, често од лица кои во моментот на поднесување на барањето биле малолетни.

„Со увид во спорната книга и споредување со официјалниот Регистар на Министерството за транспорт и врски, ќе се утврди дека деловодната книга на општина Чаир е фалсификувана. Во неа се менувани податоци и додавани дополнителни деловодни броеви“, изјави Арсовска за „Слободен печат“.

Според неа, клучниот доказ е токму тој регистар – официјалниот список на барања за утврдување на правен статус на бесправно изградени објекти што го води Министерството. Таа побара ОЈО ГОКК итно да ја обезбеди оригиналната архивска книга на општина Чаир и регистарот од Министерството, за да се споредат податоците и да се утврди точноста на обвинувањата.

„Со овие споредби ќе се покаже дека постои систематско фалсификување на документи, со што се овозможени нелегални легализации на објекти изградени надвор од сите законски рокови“, вели Арсовска.

Таа додава дека постојат и физички докази – оштетени страници од книгата и сведоци – кои може лесно да се прибават, бидејќи голем број граѓани биле директно оштетени. Нивните законски поднесени барања биле одбиени, додека нивните броеви подоцна биле злоупотребени за легализирање туѓи објекти.

Градоначалничката тврди дека ваквите активности биле овозможени со директна инволвираност на градоначалникот Ганиу и други општински службеници, со цел да се легализираат дивоградби со фалсификувани документи, дури една деценија по донесувањето на Законот за легализација на бесправно изградени објекти.

До објавувањето на овој текст, градоначалникот на Чаир, Висар Ганиу, не одговори на повиците и пораките од „Слободен печат“ за да даде своја изјава по повод овие сериозни обвинувања.