Денеска 6 февруари 2026 година се празнува Преподобна Ксенија

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

ДРУГО

Денеска 6 февруари 2026 година се празнува Преподобна Ксенија

06 февруари 2026

• од Станча Јаќимовски

Денеска Православната црква го празнува споменот на Преподобна Ксенија, света подвижничка чиј живот претставува силно сведоштво за целосна посветеност на Христовата љубов.

Преподобна Ксенија била родена во Рим како ќерка-единица на прочуен сенатор. Иако потекнувала од богато и угледно семејство, уште од млада возраст во нејзиното срце се вселила длабока љубов кон Христа. Таа не сакала да стапи во брак, иако тоа било желба на нејзините родители, бидејќи чувствувала повик за поинаков, духовен живот. За да ја избегне мажачката, тајно побегнала од домот заедно со своите две робинки и заминала на островот Коа, во местото Милас.

Таму Ксенија основала обител на девици, кои се подвизувале во живот исполнет со молитва, пост и стремеж кон христоуподобување. Иако била жена, таа покажувала извонредна духовна и телесна издржливост. Нејзиниот подвиг бил строг: често стоела на молитва цела ноќ, постела ревносно и бдеела со голема трпеливост. Се облекувала посиромашно од сите сестри во манастирот, а од смирение врз лебот што го јадела често истурала пепел од кадилницата, потсетувајќи се на минливоста на земниот живот.

Во мигот на нејзината смрт, во 455 година, над манастирот се појавил чудесен и прекрасен знак: венец од ѕвезди со крст во средината, кој светел посилно од сонцето. Овој небесен знак бил сведоштво за нејзината светост и за Божјата благодат која почивала врз неа. По нејзиното упокојување, од моштите на Преподобна Ксенија мнозина болни добиле исцеление, а нејзината слава се проширила меѓу верниот народ.

Двете робинки кои ја следеле уште од напуштањето на родниот дом, целосно го прифатиле примерот на својата игуманија. Тие исто така живееле во подвиг и смирение, а по нивната смрт, според сопствената желба, биле погребани крај нозете на блажената Ксенија.

Животот на Преподобна Ксенија останува траен пример за одрекување од светската слава, за верност кон Христос и за тивка, но силна светост која и денес ги охрабрува верниците.