19 јануари 2026
• од Гоце Кически
Денес, на 19 јануари, Православната црква го празнува големиот празник Богојавление, познат и како Теофанија или Просветување — денот кога, со Крштението на Исус Христос во реката Јордан, на светот јасно му се откри тајната на Божествената Троица.
Кога Господ Исус наврши триесет години од Своето телесно раѓање, го започна Својот учителски и спасителен подвиг токму со Крштението во Јордан. Во тој миг се јави Отецот со Своето сведоштво за Синот, Светиот Дух слезе во вид на гулаб, а Синот влезе во водите — објавувајќи ја Троицата како едносуштна и неразделна.
Со сведоштвото на светиот Јован Крстител: „Еве го јагнето Божјо кое на Себе ги зеде гревовите на светот“ (Јн. 1, 29), и со потопувањето на Христа во Јордан, се откри и Неговата мисија — патот на спасението за целиот човечки род. Потопувањето го означува умирањето на стариот, гревовен човек, а излегувањето од водата — воскресението во нов, очистен и обновен живот.
Празникот Богојавление се нарекува и Просветување, затоа што настанот на Јордан ја осветлува вистината за Бога како Троица, но и затоа што преку светото Крштение секој верник се просветлува, станувајќи восиновен од Отецот, со заслугата на Синот и со силата на Светиот Дух.
Во православната традиција, денешниот ден се одбележува со чинот на Големото осветување на водите — симбол на обновата на целото создание и повик кон духовно очистување, вера и преображение.
Ненадминливи Понуди Дневно
4.8 (10276 рецензии)
Заштедете 152.00 ден

