Дождовите не запираат – еве каде водостоите достигнаа критично ниво!

Според утринските податоци од хидролошките станици низ земјава, водостоите на сите реки се значително високи, со тенденција на натамошен пораст во текот на денот, соопштуваат од Управата за хидрометеоролошки работи (УХМР).

Како резултат на обилните врнежи од дожд, вчера беа регистрирани локални излевања на река Маркова на неколку места долж нејзиното течение. Сепак, прогнозите укажуваат на постепено намалување на водостојот и стабилизирање на состојбата во текот на денешниот ден.

Значително висок водостој е забележан и на река Вардар, низ целото нејзино течение – од горниот тек во Полошката Котлина, низ градот Скопје, па сé до средниот и долниот дел од сливот, каде што се очекува префрлување на водниот бран кон Велес, Демир Капија и Гевгелија.

Реката Треска исто така бележи висок водостој, особено околу месноста Пласница, каде што постои можност за локално излевање и поплавување на околните ливади. Иако се очекува постепено стагнирање на водостојот, тој ќе остане на високо ниво.

Реката Струмица има висок водостој по целото течение, а река Лепенец, како резултат на врнежите во Косово, бележи зголемен водостој во текот на ноќта и утрото, кој се очекува да опаѓа во текот на денот.

Во случај на поројни врнежи во текот на денот, можно е брзо и нагло зголемување на нивото на помалите реки и суводолиците, предупредуваат од УХМР. Граѓаните се повикуваат на внимателност при движење покрај реките и суводолиците, бидејќи постои ризик од брзи промени во нивото на водата.