Зеленски: Русија мора да ја прекине војната што ја започна против Украина

Русија, на еден или друг начин, ќе мора да ја прекине војната што ја започна против Украина. Подобро е тоа да се случи порано отколку подоцна.

Ова го изјави претседателот на Украина, Володимир Зеленски, во своето вечерно видео обраќање, пренесува „Укринформ“.

Тој така го коментираше молкот од руската страна во однос на предлогот за средба во Турција.

„Токму што разговарав со претседателот на Турција, Реџеп Таип Ердоган. Разговорот беше значаен. Му сум благодарен за поддршката. Му ја потврдив мојата подготвеност за директни и суштински преговори со Путин. Украина секогаш ја поддржувала дипломатијата. Подготвен сум да дојдам во Турција“, изјави Зеленски.

Претседателот истакна дека светот сè уште не добил јасен одговор од Русија на бројните предлози за прекин на огнот, додека руските напади продолжуваат.

„Москва цел ден молчи за предлогот за директна средба. Тоа е навистина чуден молк. Како и да е, Русија ќе мора да стави крај на оваа војна – и колку побрзо, толку подобро. Нема смисла да продолжат убиствата. Претседателот Ердоган изрази целосна подготвеност да биде домаќин на средбата. Важно е и претседателот Доналд Трамп целосно да ја поддржи средбата и би сакале тој да најде можност да присуствува во Турција“, додаде украинскиот претседател.

Зеленски уште еднаш нагласи дека Украина никогаш не ја посакувала оваа војна, уште од самиот почеток.

„Заедно со нашите партнери работиме на обезбедување на безбедноста, подготвуваме цврста основа за мир и преземаме заеднички чекори за дипломатијата навистина да проработи“, истакна тој.

Инаку, се потсетува дека Зеленски го поздрави евентуалното присуство на американскиот претседател Доналд Трамп на преговорите со Владимир Путин што треба да се одржат во Истанбул на 15 мај.