Бугарија ја шири туристичката мапа: Варна поврзана со најбараните европски дестинации

Wizz Air, една од водечките нискобуџетни авиокомпании во Европа, ја зацврстува својата позиција во Бугарија со стационирање на втор авион во својата база во Варна. Со оваа стратешка одлука, компанијата го проширува својот распоред со шест нови европски дестинации – чекор што говори многу за сè позабележителниот економски подем на Бугарија.

Новите линии од Варна ќе поврзуваат патници со Виена, Барселона, Хамбург, Франкфурт-Хан, Тревизо и Катовице. Дополнително, постојните линии до Лондон, Берлин и Милано ќе добијат поголема фреквенција, што ќе ја зголеми достапноста на патувањата за локалното население, но и ќе ја зајакне поврзаноста на бугарскиот Црноморски регион со некои од најголемите европски метрополи.

Оваа инвестиција не е само добредојдена новина за патниците – таа претставува и силен сигнал за економската стабилност и растот на Бугарија. Додека многу земји се соочуваат со турбуленции во авиоиндустријата, Бугарија покажува дека е привлечна дестинација за странски инвестиции, со стабилна инфрастуктура, стратегиска географска позиција и постојано зголемена побарувачка за патувања.

Со проширувањето на своето присуство, Wizz Air директно придонесува за отворање на нови работни места, зголемување на туристичкиот сообраќај и дополнителен економски раст, особено во регионот на Варна. Ова е уште еден показател дека бугарската економија не само што се движи во позитивна насока, туку и станува сè поатрактивна за глобалните бизниси.

За македонските граѓани, ова значи и нови можности – Варна станува уште подостапна порта кон Европа, со поволни авио-карти и зголемен избор на летови. Со новите рути, патувањата стануваат полесни, побрзи и поисплатливи.