Андреј Ѓуров ќе ја предводи привремената бугарска влада

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

СВЕТ

Андреј Ѓуров ќе ја предводи привремената бугарска влада

11 февруари 2026

• од Станча Јаќимовски

По два месеца политички застој, Бугарија доби име за предводник на привремената влада. Претседателката Илијана Јотова одлучи мандатот за составување и водење на техничката влада да му го довери на заменик-гувернерот на Народната банка, Андреј Ѓуров. Владата ќе има задача да го подготви теренот за парламентарните избори закажани за 19 април.

Официјалното доверување на мандатот ќе се одржи на 12 февруари во претседателската резиденција „Дондуков 2“.

Контроверзии околу мандатот

Ѓуров е поранешен пратеник и лидер на парламентарната група на „Продолжуваме промената“, а во 2023 година беше назначен за заменик-гувернер на Народната банка на Бугарија. Неговиот мандат беше проследен со контроверзии, откако распуштената Комисија за спречување корупција го обвини дека продолжил да учествува во управувањето на политичка партија, трговско друштво и две здруженија.

Сепак, на крајот на 2024 година, Градскиот административен суд во Софија ја поништи одлуката на Комисијата. Случајот сè уште се води пред Судот на Европската Унија, што ја остава неговата кандидатура како предмет на критики од дел од јавноста.

Политички консултации и поддршка

Политичките консултации меѓу претседателката и парламентарните партии завршија вчера. Јотова инсистираше дека изборот на привремен премиер треба да произлезе од споделена одговорност со Народното собрание, кое ја води листата на потенцијални кандидати – таканаречената „домска книга“.

Поддршката за Ѓуров беше ограничена. Јасна поддршка дадоа АПС и „Величие“, додека коалицијата „ПП-ДБ“ делумно го поддржа, посочувајќи дека другите кандидати се поврзани со контроверзниот бизнисмен и политичар Дељан Пеевски.

Лидерот на ПП, Асен Василев, изјави дека најважно е да се обезбедат фер избори и оцени дека изборот на Ѓуров претставува чекор во таа насока. Тој додаде дека евентуалното назначување на Бојко Рашков за министер за внатрешни работи би било гаранција за изборна транспарентност.

Од редовите на ГЕРБ, заменик-претседателката Деница Сачева истакна дека изборот на Ѓуров е резултат на консултациите, но нагласи дека составот на кабинетот ќе остане во целосна прерогатива на претседателката. Според неа, „кабинетот ќе биде на ПП-ДБ и на г-ѓа Јотова“.

Новата лидерка на БСП, Наталија Киселова, повика на компетентен и независен владин состав што ќе гарантира фер изборен процес, додавајќи дека владата најверојатно ќе биде формирана до 18 февруари.

Од „Величие“, Ивелин Михајлов го оцени Ѓуров како „контрапункт на досегашните привремени премиери“ и ја поддржа идејата Рашков да го предводи Министерството за внатрешни работи, нагласувајќи ја неговата независност од Бојко Борисов.

Клучен тест – фер избори

Во разговор со претседателката кон крајот на јануари, Ѓуров изјави дека е подготвен да ја предводи владата, под услов тоа да се случи „со јасни принципи и без скриени услови“. Тој потенцираше дека единствениот предуслов за фер избори е политичката неутралност на привремената влада.

Формирањето на техничкиот кабинет ќе биде клучен тест за политичката стабилност во Бугарија, особено во контекст на продлабочените поделби меѓу главните парламентарни партии и зголемените очекувања за транспарентен изборен процес.