ВМРО-ДПМНЕ ја блокира анкетната комисија за Кочани – Зошто бегството од одговорност?
Иницијативата за формирање анкетна комисија за трагедијата во Кочани, предложена од Демократската унија за интеграција, наиде на ѕид од страна на ВМРО-ДПМНЕ. Според координаторот на пратеничката група, Никола Мицевски, барањето е „противуставно“ бидејќи наместо потребните 20 потписи, собрало само 16.
„Според информациите со кои располагаме, поднесеното барање не е во согласност со уставните норми. Анкетната комисија не смее да добие карактер на истражно тело – нејзината улога е да донесе политички заклучоци, а не да истражува“, изјави Мицевски во гостување на МРТ.
Оваа реакција на ВМРО-ДПМНЕ отвора дилема – дали е ова правно-формалистичка одбрана или обид за избегнување на политичка одговорност? Особено ако се има предвид тежината на случајот што го потресе Кочани и целата јавност.
Дополнително, Мицевски се осврна и на иницијативата за лидерска средба предложена од претседателот на СДСМ, Венко Филипче, оценувајќи ја како обид за политичка самопромоција.
„До овој момент, ние немаме добиено официјално барање за лидерска средба. Сето тоа се води преку медиумите. Очигледно е дека Венко Филипче се обидува да се факторизира како политички лидер, но тоа не нè обврзува да влегуваме во разговори кои немаат конкретна цел или правна основа“, рече Мицевски.
Тој додаде дека ВМРО-ДПМНЕ останува отворена за разговори, но само ако предлозите се во рамките на Уставот и законите.
Прашањето што останува отворено е: дали е навистина спорна процедурата – или пак причината поради која ВМРО-ДПМНЕ не сака анкетна комисија лежи во нешто подлабоко? Дали власта се плаши од тоа што може да се открие? И дали јавноста ќе добие одговори за трагедијата што ја потресе Кочани?