Таравари со детали за починатиот пациент и шансите за преживување на другите!

Состојбата на повредените од трагедијата што неодамна го потресе градот Кочани и натаму останува сериозна. Министерот за здравство Арбен Таравари денеска излезе со нови информации, информирајќи дека тројца пациенти се сѐ уште во критична состојба и се лекуваат надвор од земјата, додека вкупно 15 пациенти се наоѓаат на механичка вентилација.

„Александар, кој почина утрово, беше најтешкиот од четирите критични пациенти. Искрено се надеваме дека состојбата на останатите тројца ќе се подобри, иако кај вакви случаи секогаш постои ризик од влошување. Сепак, имаме некои позитивни знаци – дел од пациентите кои беа интубирани се веќе екстубирани, што дава надеж,“ изјави министерот Таравари.

Тој додаде дека денеска се очекува тројца од пациентите кои се лекуваат во странство да се вратат во државата, што е дел од поширокиот процес на репатријација и континуирана здравствена грижа за сите повредени.

„Ќе причекаме да се вратат сите пациенти, за потоа да може да се направи целосна проценка на нивната здравствена состојба и потребата од понатамошно лекување“, додаде Таравари.

Трагедијата во Кочани ја потресе целата јавност, а институциите остануваат мобилизирани во напорите да обезбедат најдобра можна здравствена нега за настраданите. Поддршката од граѓаните и медицинските тимови е огромна, со надеж дека бројот на жртви нема дополнително да се зголеми.