Спортот ни обединува и  зближува со Бугарија по трагедијата во Кочани

Трагедијата што го погоди градот Кочани длабоко го потресе не само народот на С. Македонија, туку и срцата на соседна Бугарија. Во знак на солидарност и човечка блискост, клубовите  „Медуис“ од Сандански и клубот од Ново Село, Северна Македонија, организираат две хуманитарни пријателски средби со цел да се помогне на настраданите жители на Кочани.

Натпреварите ќе се одржат оваа сабота и недела, на 5 и 6 април, со почеток од 16:30 часот, во спортската сала „Христо Татарчев“ во Ново Село. Организаторите ги повикуваат сите љубители на спортот, хуманитарци и луѓе со големо срце да присуствуваат и да дадат свој придонес.

Цената на билетот е симболични 100 денари, а сите собрани средства ќе бидат донирани на Црвениот крст за помош на погодените семејства од Кочани. Според информациите од Општина Сандански, ова не се обични спортски натпревари – туку гест на блискост, соработка и разбирање меѓу два соседни народа.

„Спортот не е само натпреварување – тој е мост кој ги спојува луѓето, ги надминува границите и политиките, и ја покажува најдоброто од човечноста,“ велат организаторите. Тие ја нагласуваат важноста на заедничкиот дух, кој во вакви тешки моменти излегува на површина и нè потсетува дека хуманоста нема националност.

Оваа иницијатива е силен симбол на солидарност и уште еден чекор кон продлабочување на пријателството меѓу Северна Македонија и Бугарија. Во време на болка и загуба, спортот повторно покажа дека има моќ да обедини, да мотивира и да донесе надеж.

Хуманитарните натпревари се отворени за сите, а од општината апелираат: „Да подадеме рака, да бидеме едно и да покажеме дека сме заедно – во радост, но и во тага.“