Скандал во Тетово: Наместо парк – 2.000 станови и профит за избрани!

Граѓанската иницијатива „Тетово сака парк“ повторно ја крена својата борба за зеленило во срцето на градот, откако државно земјиште на просторот на поранешниот „Монопол“ беше продадено за само 7.000 евра. Наместо таму да никне парк – нешто што граѓаните го бараат со години – локалните власти донесоа одлука да се изградат околу 2.000 нови станови.

Иако иницијативата одамна предлагаше променa на Генералниот и Деталниот урбанистички план за таа локација со цел таа да стане јавен парк, општинските власти го одбија предлогот. Од „Тетово сака парк“ тврдат дека со промената на намената на земјиштето можело лесно, етапно и без трошоци да започне процесот за изградба на парк – простор за спорт, рекреација и социјализација кој ѝ е насушно потребен на заедницата.

„Советот можеше да донесе одлука без да потроши ниту денар, но наместо тоа, се одлучи за интересите на градежниот капитал. Очигледно е дека профитот ја надвладеа јавната добробит“, велат од иницијативата.

Кон крајот на 2024 година, Советот на Општина Тетово ги смени урбанистичките планови не за да се предвиди парк, туку за да се отвори патот за масовна станбена изградба. Земјиштето потоа било продадено за симболична сума, што ги продлабочи сомнежите во транспарентноста и мотивите на локалната власт.

„Касами никогаш не даде објаснување зошто плановите беа сменети и како дозволи ваков потег. Негова работа не е да се грижи за приватниот профит на градежници, туку за јавниот интерес на граѓаните“, посочуваат активистите.

Тие обвинуваат дека општината свесно го игнорирала фактот дека најголем дел од земјиштето е државно, одбивајќи го нивниот предлог под изговори и провокации.

„Нè обвинуваа дека имаме скриени мотиви, а сега е јасно дека токму тие имаа. Градењето парк не носи пари, но згради носат огромни профити. Сè е јасно“, категорични се од иницијативата.

Касами, во последните свои изјави, се обидува да го пренасочи вниманието кон евентуална изградба на парк кај Касарната, но од „Тетово сака парк“ велат дека тоа е само маневар за одвлекување на фокусот. Според нив, најсоодветна локација за парк е токму „Монопол“ – простор кој сега се раздава за приватни интереси.

Иницијативата апелира итно да се суспендираат измените на плановите и да се запре понатамошната продажба и бетонизација додека не се донесе нов, современ и инклузивен Генерален урбанистички план за Тетово.

„Бараме во процесот конечно да се вклучи стручната и пошироката јавност, а не да се води зад затворени врати, во интерес на нечии џебови. Овој град не смее повеќе да биде жртва на приватни апетити. Тетово сè уште сака парк. Луѓето пред капиталот!“, порачуваат од иницијативата.