Шокантна изјава од Таравари: Албанците се незадоволни од ВЛЕН!

Министерот за здравство и еден од лидерите на коалицијата ВЛЕН, Арбен Таравари, изрази сериозна загриженост за начинот на кој функционираат партиите на Албанците во Владата, истакнувајќи дека коалицијата ВЛЕН функционира "тромо" и дека потребно е да се најде подобар модел за синхронизација. Според него, оваа оценка не е само лична, туку се темели на анкети спроведени пред се’ меѓу Албанците во земјата.

Во интервју за емисијата "360 степени" на МРТ, Таравари изјави дека постои јасна неусогласеност во функционирањето на коалицијата, што е видливо и за обичниот народ. Според него, впечатокот кој го имаат граѓаните е дека ВЛЕН има слаба позиција во Владата, што негативно се одразува на перцепцијата за успехот на коалицијата.

„Јас мислам дека имаме многу недостатоци. Тоа не е толку до премиерот Мицкоски, колку што е до нас. Постои некаква неусогласеност што се гледа од 100 километри, дека многу бавно функционираме. Впечатокот е на народот, што е најлошо за нас, дека ВЛЕН има многу слаба позиција во Владата“, изјави Таравари. Тој дополни дека резултатите од анкетите кои ги спровел покажуваат дека околу 70% од Албанците во Македонија сметаат дека коалицијата не функционира како што треба и дека претставувањето на Албанците во Владата не е задоволително.

Таравари објасни дека кога зборува за претставувањето на Албанците во Владата, не мисли само на квантитетот, односно бројот на министри и директори, туку на квалитетот на нивната работа. Според него, иако ВЛЕН има добро претставување во квантитативен поглед, во квалитативен поглед постојат сериозни проблеми.

„Ако земете во квантум, значи број на министри, број на директори, океј е претставувањето на ВЛЕН во Владата. Меѓутоа, ако го земете квалитативно, тоа не е баш како што треба, не функционира баш како што треба и тоа е генерален впечаток на повеќето, зборувам за Албанците“, нагласи Таравари.

Во однос на претстојните локални избори, Таравари посочи дека прашањето за тоа дали ВЛЕН ќе настапи со заеднички листи за советници и кандидати за градоначалници е се уште отворено. Тој потсети дека ова прашање беше актуелизирано уште минатата година, кога се појави идејата коалицијата ВЛЕН да прерасне во единствена партија.

Со оглед на изјавите на Таравари и сериозните критики кои ги упати на внатрешното функционирање на коалицијата, останува да се види какви ќе бидат реакциите од останатите членови на ВЛЕН и како ова ќе влијае на политичката динамика во Владата и на локалните избори.