СДСМ: Синдикалната кошничка расте, народот тоне – Владата молчи!

Во своето најново соопштение до јавноста, Социјалдемократскиот сојуз на Македонија (СДСМ) остро ја критикува актуелната владејачка гарнитура за, како што велат, целосен економски неуспех и социјална нечувствителност. Повод за реакцијата се најновите податоци за порастот на трошоците за живот, според кои синдикалната минимална кошничка е поскапена за 1.217 денари само за еден месец, додека само за храна и пијалоци трошоците се зголемиле за 954 денари.

Според СДСМ, денес едно просечно четиричлено семејство треба да обезбеди речиси 64.000 денари месечно само за основни потреби, што го отсликува растечкиот економски притисок врз граѓаните. Тие обвинуваат дека оваа состојба е директен резултат на неспособноста на владата предводена од ВМРО-ДПМНЕ и движењето ЗНАМ.

„Цените растат, платите стојат, мерки – нема!“, стои во соопштението, каде СДСМ ги осудува трошоците на власта за луксузна храна, во време кога мнозинството граѓани се соочуваат со сериозни финансиски потешкотии. Тие потенцираат дека државната СОЗР во април и мај склучила договори вредни 2.2 милиони денари за луксузни продукти како октоподи, лосос и школки.

„Ова не е политика, ова е грабеж“, додаваат од СДСМ, барајќи итна промена на економските политики и реални мерки кои ќе им помогнат на граѓаните.

Партијата повикува на следниве конкретни мерки:

• Покачување на минималната плата на 500 евра;
• Зголемување на платите во јавниот и приватниот сектор;
• Укинување на ДДВ за храна со цел намалување на цените.

СДСМ порачува дека ќе продолжи да се бори за достоинствен живот, повисоки плати и економија која ќе работи за народот, а не за привилегираните функционери.