05 декември 2025
• од Станча Јаќимовски
СДСМ упатија остра реакција кон поранешниот премиер Никола Груевски, кој од 2018 година живее во Будимпешта, Унгарија, по бегството од македонското правосудство. Повод за соопштението е неговата најнова објава на социјалните мрежи во која ги нападна поранешниот и сегашниот лидер на СДСМ, Зоран Заев и Венко Филипче.
Од СДСМ го нарекоа Груевски „будимпештански пишувач на бајки“, обвинувајќи го дека земјата ја оставил во „црнило и безнадежност“, и дека и денес од далечина се обидува да влијае врз домашната политика преку ВМРО-ДПМНЕ.
„Денес, тој 'гениј' удобно сместен во срцето на Европската Унија, таму каде што никогаш не сакаше да ја однесе Македонија, дели 'мудрости' откако побегна од правдата,“ се наведува во соопштението на СДСМ. Поранешниот премиер беше опишан како „морален мал човек“, кој денес, според партијата, се крие зад статуси и пораки од безбедна дистанца.
СДСМ го спореди Груевски со „Мики Маус“, а неговата реторика со „Будимпештански бајки за деца“, додавајќи дека, наместо да ужива во унгарскиот луксуз, би требало да биде во затворот „Идризово“, каде што би можел да пишува „мемоари со наслов 'Како ја ограбив Македонија'“.
Во реакцијата се спомнува и најтесниот круг на Груевски, со алузии на минати скандали поврзани со министри, како и иронични коментари за личниот изглед на поранешниот премиер, опишан како „beauty influencer во криза на средни години“.
Дополнително, од партијата го обвинија дека и понатаму, иако физички отсутен, влијае врз политиките на ВМРО-ДПМНЕ, опишувајќи го Христијан Мицкоски како „извршител“ и „мал Мицко што го продолжува патот на својот ментор“.
„Биди барем еднаш во животот маж и дојди во Скопје. Ќе ти приредиме убав пречек – со ротации, протокол и лисици, сè на највисоко ниво, баш како што сакаш“, се вели на крајот од соопштението на СДСМ, проследено со саркастичен тон.
Во неговата последна објава, Груевски од Будимпешта директно ги нападна Заев и Филипче, со што, според СДСМ, уште еднаш покажал дека не ја напуштил политиката – иако физички ја напуштил државата.
Ненадминливи Понуди Дневно
4.8 (10276 рецензии)
Заштедете 152.00 ден

