Рамадани во МТВ: Бугарија излезе добриот сосед а не клетиот непријател
Трагедијата што го погоди Кочани не остави никого рамнодушен. Но, среде болката и несреќата, излегоа на површина и светли примери на човечност и солидарност. Еден од нив, како што истакна аналитичарот Рамадан Рамадани во гостувањето на МРТВ2, е токму поддршката што дојде од источниот сосед – Бугарија.
„Во едно време кога Бугарија беше често етикетирана како заканувачка за нашиот идентитет и национални интереси, таа токму сега, кога ни беше најтешко, излезе како прва земја што понуди помош,“ рече Рамадани.
Според него, однесувањето на Бугарија во оваа ситуација претставува пресврт во перцепцијата за односите меѓу двете земји. Бугарски пратеници организирале донации, испратиле медицинска опрема, возила за итна помош и други ресурси – чин на солидарност каков што, како што посочи Рамадани, „досега не сме го виделе“.
„Ова е момент да се истакнат и добрите нешта што произлегуваат и од најтешките ситуации,“ продолжи тој. „Поддршката од Бугарија е не само чин на хуманост, туку и позитивен сигнал за иднината на нашите односи. Тоа е мост кој политичарите треба мудро да го преминат.“
Рамадани смета дека ваквите гестови можат да бидат искористени како поттик за напредок во процесот на евроинтеграција. Иако преговорите се водат во рамките на француско-германскиот предлог и Европската унија, тој верува дека оваа ситуација ќе има позитивен импакт.
„Политичките претставници имаат обврска да ја препознаат оваа шанса – не само како момент на солидарност, туку и како можност за приближување и градење доверба,“ заклучи Рамадани.