македонија22 октомври 2024 МВР: Државниот секретар на МВР Сашо Петрушевски на деветтата Конференција за миграција во Виена - 22 ОКТОМВРИ 2024
Државниот секретар Сашо Петрушевски учествува на годишната Конференција за миграции во Виена
Виена, 22-23 октомври 2024 – Државниот секретар на Министерството за внатрешни работи (МВР) на Северна Македонија, Сашо Петрушевски, се наоѓа на годишната Конференција за миграции, која се одржува во Виена. Конференцијата, организирана од Меѓународниот центар за развој на миграциските политики (ИЦМПД), собира повеќе од 250 учесници, вклучувајќи носители на одлуки, владини претставници, експерти за миграција, претставници на меѓународни организации, како и членови на академската заедница и цивилното општество.
На деветтата Виенска конференција, учесниците дискутираат за стратешките политики и решенија во врска со миграциските текови. Македонската делегација, под водство на Петрушевски, активно учествува во разговорите за продолжување на заложбите за справување со нерегуларната миграција и за активностите поврзани со почетокот на имплементацијата на ЕУ Пактот за миграција и азил.
Петрушевски е предвидено да оствари и билатерална средба со генералниот директор на ИЦМПД, Михаел Шпенделегер. Исто така, планирани се повеќе билатерални средби со истакнати владини претставници и министри, кои учествуваат на конференцијата, со цел зајакнување на меѓународната соработка во справувањето со миграционите предизвици.
Оваа конференција се смета за значаен настан, кој има за цел да ги поврзе различните чинители во политиката за миграции и да ја унапреди соработката меѓу државите. Учеството на Северна Македонија во такви важни разговори е клучно за утврднување на идните миграциски политики и стратегии.