21 ноември 2025
• од Станча Јаќимовски
Премиерот Христијан Мицкоски денеска повторно се осврна на прашањето за финансиската независност на правосудниот систем и барањата на судиите за поголем дел од државниот буџет. Во изјава дадена при посетата на Универзитетската клиника за хируршки болести „Св. Наум Охридски“ – Скопје, тој ја спореди својата плата со платите на судиите.
Според Мицкоски, дел од претседателите на судови примаат околу 180.000 денари месечно, додека неговата плата, заедно со стажот, изнесува 155.000 денари. Тој додаде дека платите на судиите не паѓаат под 100.000 денари, а почетник судија во Македонија има годишна бруто-плата од околу 19.100 евра, во споредба со Словенија каде што истата изнесува 34.000 евра, што е за 85% повеќе. Притоа посочи дека словенечкиот БДП е за 350% поголем од македонскиот.
Премиерот истакна дека Владата ќе предложи законско решение со кое Судскиот совет и Советот на јавни обвинители ќе добијат целосна надлежност за одобрување планови за вработување и унапредување во правосудството.
– Како Влада нема да се мешаме, рече Мицкоски, додавајќи дека судските институции ќе се грижат и за сите свои набавки — од хигиенски материјали до реконструкција на објекти.
Од друга страна, тој нагласи дека Владата сепак ќе воведе собраниска комисија за надзор над работата на судовите и обвинителствата.
Минатата недела Судскиот совет, Здружението на судии и Врховниот суд му упатија отворено писмо на премиерот. Во него судиите предупредија дека изјавите на Мицкоски за судството веќе ја надминале границата на доброто однесување и се претвориле во „неаргументирани и паушални напади“.
Судиите се повикаа и на последниот извештај на Европската комисија, во кој се нагласува дека најголем проблем на македонското судство е независноста на судиите, која е поткопана од постојани интервенции од извршната и законодавната власт.
Во извештајот дополнително се укажува дека финансиската зависност на судството од државниот буџет е сериозен проблем, а платите на судиите се само еден сегмент од севкупната финансиска автономија што им е потребна.
Се проширува истрагата за трагедијата во „Пулс“: Опфатени лица од УЈП и ДПИ
Ненадминливи Понуди Дневно
4.8 (10276 рецензии)
Заштедете 152.00 ден

