29 јануари 2026
• од Станча Јаќимовски
Управата за финансиска полиција поднесе кривична пријава до Основното јавно обвинителство Скопје против Марко Беслимовски, во својство на претседател на Регулаторната комисија за енергетика, водни услуги и услуги за управување со комунален отпад. Пријавата е поднесена поради постоење основи на сомнение за сторено кривично дело „злоупотреба на службена положба и овластување“ по член 353 став 4 во врска со став 1 од Кривичниот законик.
Според наводите во пријавата, Беслимовски, спротивно на Законот за енергетика и Правилникот за лиценци, не отпочнал постапка за одземање на лиценцата за вршење енергетска дејност – трговија на големо со сурова нафта, нафтени деривати, биогорива и горива за транспорт – на правното лице „Тритерол Петрол“ ДООЕЛ Скопје, иако компанијата не ги исполнувала законски пропишаните услови.
Наместо да донесе решение за одземање на лиценцата, тој донел решение за прекин на постапката, кое, според Финансиската полиција, било незаконско. Како резултат на тоа, лиценцата не била одземена на 15 јануари 2024 година, туку дури на 14 април 2025 година.
Со ваквото постапување, како што се наведува, на „Тритерол Петрол“ ѝ било овозможено противзаконски да продолжи со вршење на енергетска дејност во период од околу 15 месеци, како и да учествува и склучува договори во постапки за јавни набавки.
Финансиската полиција тврди дека на овој начин компанијата остварила вкупен промет од 194.520.962 денари и се стекнала со противправна имотна корист во износ од 14.093.576 денари.
Основното јавно обвинителство Скопје во наредниот период треба да одлучи за понатамошното постапување по поднесената кривична пријава.
Ненадминливи Понуди Дневно
4.8 (10276 рецензии)
Заштедете 152.00 ден

