Костова: За Владата може да има папаја и луксузи, за работникот трошки на софрата

Празниците би требало да бидат време на мир, поддршка и грижа, но според потпретседателката на СДСМ, Кристина Костова, работниците во Македонија под власта на ВМРО-ДПМНЕ не го чувствуваат тој спокој – ни на празници, ни во секојдневието.

На денешната прес-конференција, Костова остро ја критикуваше Владата предводена од Христијан Мицкоски, посочувајќи дека бројни категории вработени во јавниот сектор – меѓу кои културни работници, вработените во Центрите за социјална работа, Трудовиот и Пазарниот инспекторат, како и оние во Министерството за економија – го дочекаа Велигден без исплатена плата.

„Овие граѓани празникот го дочекаа во неизвесност и разочараност, без можност да ги подмират основните животни потреби“, изјави Костова. Таа го нарече ова директно кршење на законот, кој јасно пропишува дека платата мора да биде исплатена најдоцна до 15-ти во месецот за претходниот месец.

Костова оцени дека ваквиот однос е јасен показател за вистинското лице на Владата – потполна незаинтересираност за граѓаните и кршење на основните права на работниците.

„Платата не е награда, таа е основно, законски загарантирано право. До таму дојдовме да во Македонија веќе не се зборува за економски развој, туку за тоа дали власта ќе ја исполни законската обврска – исплата на заработената плата“, нагласи таа.

Со остар тон, Костова порача: „За Владата може да има папаја, манго и луксузи, а за работникот само трошки на софрата. Ова е врв на неодговорност и неспособност.“

Потпретседателката на СДСМ истакна и дека за само 10 месеци од мандатот на оваа Влада, животот на работниците се претворил во борба за преживување. Животниот стандард е на дното, цените и сметките постојано растат, а Македонија останува држава со најниски плати во регионот.

„Ова е сликата на 'новото нормално' – луксуз за власта, празни џебови за сите други“, заклучи Костова, барајќи итна исплата на платите за сите вработени во јавниот сектор и одговорност за доцнењето.