ГТЦ со загуба од 600.000 евра во 2024: Високи трошоци, пад на приходите од реклами и неизвесна наплата

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

ГТЦ со загуба од 600.000 евра во 2024: Високи трошоци, пад на приходите од реклами и неизвесна наплата

18 јули 2025

• од Станча Јаќимовски

Градскиот трговски центар (ГТЦ), некогашен симбол на урбаното живеење во Скопје, ја заврши 2024 година со бруто загуба од околу 600.000 евра. Според годишниот извештај што го усвои Собранието на акционери, вкупните приходи на компанијата изнесувале 261,9 милиони денари, додека расходите достигнале 286,2 милиони денари, што резултирало со нето загуба од 24,38 милиони денари.

Во извештајот се истакнува дека ликвидноста на Друштвото е сериозно нарушена поради отежната наплата на побарувањата, дел од кои датираат уште од 1997 година. И покрај преземените активности и префрлањето на тужбите кај извршителите, наплатата на овие долгови останува неизвесна.

Основни активности поради финансиски ограничувања

Финансиската нестабилност го принудила раководството на ГТЦ да се фокусира исклучиво на основни активности за одржување и минимални реконструкции. Во објаснувањето се посочува дека застарените инсталации, опрема и делови од објектот бараат итни интервенции, но ограничените средства го оневозможуваат тоа.

Ниски приходи од закупнина и реклами

Иако приходите од закуп на деловен простор, магацини и тераси бележат скромно зголемување од 4%, интересот за изнајмување останува слаб, особено за неатрактивните локации. ГТЦ и покрај повеќекратните огласувања, не успева да најде закупци за дел од слободните простории.

Приходите од реклами паднале во споредба со 2023 година, а тие од комуналии и тековно одржување се зголемиле за 3%. Приходите од паркиралишта, пак, бележат раст од 5% и достигнуваат 33,3 милиони денари. Финансиските приходи, претежно камати, се намалени за 1% и учествуваат со само 2% во вкупните приходи.

Најголемиот дел од приходите – околу 74% – се од услуги поврзани со одржување и потрошувачка на енергија, вода и други трошоци од закупците.

Платите „јадат“ третина од приходите

Еден од најголемите трошоци за ГТЦ се платите на вработените. Во 2024 година, за 206 вработени биле исплатени околу 2 милиони евра, што е зголемување од 18% во однос на претходната година. Само оваа ставка покрива речиси третина од годишните приходи на центарот.

Ново раководство, нови надежи?

Во ноември 2024 година, на чело на акционерското друштво беше назначен нов извршен директор – Никола Соколовски, угостителско-туристички менаџер. Истовремено, беше сменет и целиот Управен одбор, кој сега брои седум члена – Ферик Белули, Јован Лукаров, Катица Грче, Виолета Блажевска, Васе Ангеловски, Александар Тасев и самиот Соколовски.

И покрај тешката финансиска состојба, од управата велат дека очекуваат стабилизација и подобрување на приходите во наредната година, особено ако успеат да изнајмат дел од слободните деловни простори преку објавените лицитации.

ГТЦ, како урбан симбол на Скопје, и понатаму се соочува со предизвици поврзани со наплата, намален интерес за закуп и високи трошоци. Новото раководство има задача да го врати центарот на позитивна финансиска патека.