Градоначалник на Карпош бесен: „Ова не е метропола, туку депонија!“
Стевчо Јакимовски, остро ја нападна работата на Јавното претпријатие Комунална хигиена – Скопје, посочувајќи дека целиот град е заложник на нивната неспособност и нефункционалност. Тој повика на итни измени во законската регулатива и децентрализација на претпријатието, за проблемот конечно да почне да се решава.
„Скопје со години се дави во ѓубре, а 700.000 граѓани се заложници на едно јавно претпријатие кое не функционира. По населбите кантите стојат преполни со денови, па и со недели. Имавме изговори за време на Рамазан, но и по празниците состојбата не се менува. Изгледа сега имаат шеќерен шок од постите, па не можат да се вратат на терен“, рече Јакимовски.
Предлог: Децентрализација на Комунална хигиена
Градоначалникот предлага со новиот Закон за локална самоуправа, ЈП Комунална хигиена да се подели на општинско ниво, заедно со средствата што граѓаните ги плаќаат за одржување на јавната чистота. Според него, само така може да се воспостави одговорност и ефикасност.
„Ако ние како локална самоуправа ја носиме одговорноста пред граѓаните, тогаш треба да имаме и надлежност. Моментално, ниту има резултати, ниту некој понесува одговорност. Ајде да бидеме искрени – дали некој знае како се вика директорот на Комунална хигиена? Не. Но сите знаат кој е градоначалникот – затоа токму градоначалниците треба да одговараат за чистотата“, изјави тој.
Барање за нови закони и построга контрола
Јакимовски побара и измени во законите со кои ќе се воведат казни за граѓаните што не го фрлаат ѓубрето во соодветни канти, посочувајќи дека моментално владее „целосна општествена неодговорност“. Дополнително, тој го повика министерот за транспорт и врски да не ги чува измените на Законот за домување, туку итно да предложи нов Закон за комунална инспекција.
„Не можеме веќе вака. Веќе 30 години Скопје е малку почисто, малку понечисто – ама никогаш чисто. Комунална хигиена вака како што е, нема да го исчисти градот ни за 40 години. Ако сакаме Скопје да личи на метропола, мора да воведеме ред. Ако не можеме како европски градови, ајде барем како соседите“, порача Јакимовски.
Со вакви остри, но директни зборови, тој ги отвори прашањата за ефикасноста, одговорноста и потребата од реформи во јавните претпријатија, ставајќи акцент на секојдневниот проблем на скопјани – јавната хигиена.