Голема благодарност од Силјановска: „Бугарија реагираше прва, кога најмногу ни требаше“

Човечноста и солидарноста повторно докажаа дека се поголеми од политиката и границите. Претседателката на Република Северна Македонија, Гордана Силјановска-Давкова, за време на својата посета во Софија, упати искрена благодарност до бугарскиот претседател Румен Радев и целиот бугарски народ за поддршката и помошта по трагичниот пожар во Кочани.

„Сакав да му се заблагодарам, како човек пред сѐ. Господинот Радев беше првиот што ми се јави веднаш по трагедијата, нудејќи помош од секој можен аспект,“ изјави Силјановска-Давкова со длабока емоција. Таа додаде дека токму во моменти на голема болка се гледаат вистинските пријатели.

Претседателката посети и болницата во Софија каде што се лекуваат повредените млади од пожарот. Се сретна со нивните родители и блиски, но и со медицинскиот тим – меѓу кои и македонски лекари кои студирале и останале да работат во Бугарија. „Сите беа неверојатни – од лекарите, до директорот на болницата и министерот за здравство. Ова не беше само медицинска грижа, туку вистинска грижа од срце,“ рече таа.

Во разговорот со Радев, покрај благодарноста, беше допрена и темата за политичките предизвици меѓу двете земји. „Не е време за политички говори, но едно е јасно – мораме почесто да се среќаваме, да комуницираме, и ние политичарите, и новинарите, и културните работници, и студентите. Напредокот на Бугарија е и наш напредок, напредокот на регионот е заеднички,“ истакна Силјановска-Давкова.

Таа со емотивен тон заклучи: „Во еден толку тежок свет, кога ќе бидеш опкружен со хуманост и подадена рака, гледаш на сѐ – и на проблемите – со други очи. Во такви моменти, не останува простор за разделби, туку за обединување.“

Своето присуство во Софија, Силјановска-Давкова го искористи и за учество на високиот безбедносен форум „Процес Акаба за Балканите III“, под покровителство на бугарскиот претседател Радев и кралот на Јорданија, Абдула Втори. На настанот присуствуваа лидери од целиот регион, сплотени околу заеднички цели – безбедност, соработка и стабилност.