Гест кој ќе остане запаметен: Македонската претседателка им се поклони на бугарските херои!

Претседателката Гордана Сиљановска-Давкова е на официјална посета во Бугарија, каде што најпрво ја посети болница „Пирогов“ во Софија. Во оваа болница се лекуваат осум македонски државјани, повредени во трагичниот пожар што го зафати градот Кочани минатиот месец.

„Со чувство на длабока и искрена грижа, најпрво ја посетив болницата „Пирогов“ во Софија каде што се згрижени и се лекуваат македонските граѓани повредени во трагичниот пожар во Кочани“, изјави претседателката.

За време на посетата, таа оствари средба со бугарскиот министер за здравство, проф. д-р Силви Кирилов, заменик-директорот на болницата, проф. д-р Николај Габровски, како и со доц. д-р Маја Аргирова, која раководи со Одделот за изгореници и пластична хирургија.

„Бев информирана дека здравствената состојба на осумтемина македонски пациенти е стабилна, се наоѓаат под постојан надзор од страна на врвни, искусни лекари и дека процесот на закрепнување бележи напредок“, додаде претседателката.

Во присуство на македонски лекар, претседателката разговараше и со најблиските роднини на пациентите, кои со голема благодарност зборуваа за професионалниот и човечки пристап на медицинскиот персонал, како и за напредокот на нивните најмили.

Таа се сретна и со дел од медицинските тимови кои директно учествуваа во итната медицинска интервенција по трагедијата, изразувајќи им длабока благодарност за нивната пожртвуваност и професионалност.

„Нивната благородна мисија е вистинско олицетворение на медицинската етика, солидарноста и хуманоста, вредности коишто ќе останат темел на заемна почит и искрено пријателство меѓу двата блиски народа, бугарскиот и македонскиот“, порача таа.

Посетата на болницата „Пирогов“ доаѓа како дел од пошироките напори за зајакнување на регионалната соработка и меѓусебната хуманост меѓу соседните држави, особено во моменти на заедничка болка и солидарност.