ДУИ: Зошто Македонија остана надвор од стратешкиот воен сојуз со НАТО-сојузниците?

Од партијата Демократска унија за интеграција (ДУИ) изразија сериозна загриженост поради тоа што Македонија не беше вклучена во новата иницијатива за воена и индустриска соработка меѓу Албанија, Косово и Хрватска — соработка која веќе има позитивни ефекти врз економиите на овие земји.

ДУИ поставува неколку клучни прашања: Дали сме заборавени? Дали сме исклучени? Или пак оваа влада одбила да учествува?

Според нив, оваа изолација доаѓа во критичен момент за безбедноста на регионот, кога евроатлантските партнери вложуваат во зајакнување на одбраната на Западен Балкан. Додека другите земји се движат во насока на зацврстување на врските со НАТО и западните сојузници, од ДУИ обвинуваат дека македонската Влада, особено Премиерот и Министерот за одбрана, се приближуваат до Белград и неговите сојузници.

Дополнително, тие посочуваат дека некои министри од актуелната власт редовно присуствуваат на настани во амбасади на Русија и Кина, додека други учествуваат во државни церемонии кои се отворено спротивставени на вредностите на НАТО — алијанса во која Македонија е полноправна членка.

ДУИ директно го прашува коалицискиот партнер ВЛЕН: Зошто молчите? Дали ова е правецот што го избравте за државата? Зошто се оддалечуваме од нашите природни и стратешки партнери?

Партијата оценува дека ова не е само голем надворешно-политички неуспех, туку и предавство на евроатлантската иднина на земјата. Тие најавуваат дека прашањето ќе го отворат и во Собранието, но и пред меѓународните партнери, со цел да се добие целосна транспарентност за причините поради кои Македонија не е дел од оваа значајна стратешка иницијатива.

ДУИ, како што велат, ќе продолжи да се залага за силен и недвосмислен курс кон интеграција со западниот свет, сметајќи дека тоа е единствениот пат за стабилност, развој и сигурна иднина за државата.