Драма во Ресен: Мечка заглавена во стапица!
Во близина на селата Љубојно и Брајчино, во општина Ресен, беше пронајдена мечка заробена во криволовна стапица. Брзата реакција на надлежните служби резултираше со успешно спасување и ослободување на животното.
Случајот бил пријавен преку Единствениот број за итни случаи – 112, до Регионалниот Центар за управување со кризи (ЦУК) во Битола. Пријавителот алармирал откако слушнал силно рикање во близина на мостот на Брајчинска Река, сомневајќи се дека станува збор за мечка заглавена во замка.
Веднаш по дојавата, ЦУК ги известил сите релевантни институции – Граничната полиција Маркова Нога, Полициската станица Ресен, концесионерот на ловното подрачје, како и други надлежни субјекти за координирано постапување.
На терен излегле претставници од ловното друштво, ветеринар, тим од Националниот парк „Пелистер“ и полициски службеници од МВР. Мечката била успиена од страна на ветеринарот и внимателно ослободена од стапицата, без сериозни повреди.
Благодарение на навремената и стручно изведена интервенција, дивото животно повторно е на слобода. Настанот уште еднаш ја актуелизира потребата за борба против криволовот и заштитата на дивите животни, особено на заштитените видови како што е мечката.
Надлежните апелираат до граѓаните да пријавуваат слични случаи и да не ги загрозуваат животните со поставување нелегални замки – секој живот е важен и заслужува заштита.