Додик во Москва – дали ќе добие руски пасош или ќе продава матрјошки за опстанок?

Претседателот на Република Српска, Милорад Додик, за кого Судот на Босна и Херцеговина издаде централен налог за апсење, синоќа пристигна во Москва, од каде што им се обрати на јавноста преку видео порака на социјалната мрежа Екс, пренесе регионалната телевизија „Ен1“.

„Пристигнав во Москва. Го започнувам секој мој престој тука со посета на Споменикот на незнајниот воин, за да оддадам почит на 28-те милиони Руси загинати во Втората светска војна. Повторно ќе бидам тука на 9 мај по покана на претседателот на Руската Федерација, Владимир Путин, за да ја одбележам 80-годишнината од победата над фашизмот“, изјави Додик во видеото објавено на Екс.

На 26 февруари Милорад Додик беше осуден од босанскиот суд на една година затвор и шестгодишна забрана за политичка дејност поради непочитување на одлуките на високиот претставник на меѓународната заедница, Кристијан Шмит. Следниот ден, како одговор на оваа одлука, парламентот на Република Српска усвои закони со кои ја забрани работата на повеќе централни босански институции на нејзината територија. На 17 март, Судот на Босна и Херцеговина издаде налог за апсење на Додик и уште двајца претставници на парламентот на Република Српска.

Како што потсетува босанската редакција на „Ен1“, освен Додик, налог за апсење е издаден и за Ненад Стевандиќ, претседател на Народното собрание на Република Српска, и Радован Вишковиќ, премиерот на Република Српска, кои се осомничени за напад врз уставниот поредок на Босна и Херцеговина. Се уште се чека одлуката на Интерпол за распишување на црвена потерница за Додик и Стевандиќ, кои и покрај налогот за апсење, непречено влегувале и излегувале од Босна. Стевандиќ престојувал во Белград и се вратил во Бања Лука, додека Додик патувал во Белград и Израел пред да замине за Москва.

Според условите на Дејтонскиот мировен договор, кој стави крај на војната во Босна (1992-1995), државата е поделена на две полуавтономни единици – Република Српска, населена претежно со босански Срби, и Федерацијата Босна и Херцеговина (муслиманско-хрватска федерација), каде што живеат босански муслимани (Бошњаци) и босански Хрвати. Двете единици имаат свои влади, парламенти и полиција, но се поврзани преку заеднички државни институции, вклучувајќи судство, армија, безбедносни служби и даночна администрација.