26 декември 2025
• од Станча Јаќимовски
Цената на зелениот картон за автомобилите во Северна Македонија, која изнесува околу 5.500 денари годишно, повторно беше актуелизирана во Собранието. За разлика од кај нас, во соседните земји овој документ чини од 5 до 10 евра и најчесто се плаќа заедно со регистрацијата и задолжителното осигурување.
Координаторот на пратеничката група на СДСМ и пратеник, Оливер Спасовски, на денешната седница посветена на пратенички прашања ѝ упати прашање на министерката за финансии, Гордана Димитриеска-Кочоска, во врска со високата цена на зелениот картон, кој им е неопходен на граѓаните за патување со возило надвор од државата.
Спасовски потсети дека сопствениците на моторни возила, согласно закон, се обврзани при регистрација и технички преглед да имаат задолжително осигурување кое важи на територијата на државата. Но, за патување во странство, потребно е дополнително осигурување – таканаречениот зелен картон, кој претставува меѓународен доказ за осигурување на возилото.
„Граѓаните не купуваат само потврда, туку го прошируваат осигурувањето со важност и надвор од државата. Овој документ и понатаму е задолжителен за влез со моторно возило во речиси сите европски земји, а кај нас чини околу 5.500 денари за една година“, истакна Спасовски.
Тој нагласи дека во земјите од регионот цената е значително пониска и се движи од 5 до 10 евра, како и дека постојат различни механизми за намалување на трошокот. Притоа, се повика на примери од Србија, Босна и Херцеговина, Косово и Црна Гора, каде што се применуваат законски решенија и билатерални договори со одредени држави, што овозможуваат влез без зелен картон.
Како пример, Спасовски ја посочи и билатералната спогодба меѓу Северна Македонија и Словенија, според која возилата со македонски и словенечки регистарски таблички можат да се движат без зелен картон.
Со оглед на тоа, тој побара од Владата и од Министерството за финансии одговор дали се планира промена на пристапот кон ова прашање и евентуално намалување на цената на зелениот картон, со цел да им се олесни на граѓаните и да им се овозможи нормално движење надвор од државата, како што е тоа решено во соседните земји.
Спасовски посочи и дека истото прашање го доставил писмено уште на 12 февруари годинава, но до денес не добил одговор од министерката.
Ненадминливи Понуди Дневно
4.8 (10276 рецензии)
Заштедете 152.00 ден

