11 април 2026
• од Станча Јаќимовски
Денеска е Велика Сабота – денот на тишината, покојот и длабокото созерцание. Сабота значи покој, а Велика Сабота е ден на Најголемиот Покој и спомен на Најголемиот Покојник. Ова е денот што стои меѓу смртта и воскресението, меѓу страдањето и радоста, меѓу Велики Петок и Велигден – ден што ги спојува распнувањето и надежта за нов живот.
Велика Сабота е дел од Страдалната седмица и е посветена на споменот на пребивањето на Исус Христос во гробот, како и на Неговото слегување во адот. Тоа е време кога Христовото тело почива во гробот, додека духовно се случува победата над смртта.
Овој ден е втор ден на христијанската жалост – ден исполнет со тишина, молитва и внатрешен мир. Верниците го доживуваат како момент на длабока духовна концентрација, молк и почит. Саботата е и ден на оплакување на Покојникот, кога Пресвета Богородица и жените мироносици, по погребението, го оплакувале Исус Христос.
На Велика Сабота особено се изразува болката и тагата на Пресвета Богородица. Денот е определен и како време за чување на Христовиот гроб – симбол на верата и надежта дека смртта не е крај.
Во Македонија, традицијата налага Велика Сабота да се помине во подготовка за најголемиот христијански празник – Велигден. Иако некои ја сметаат за празник само додека се во црква, по враќањето дома се вршат последните подготовки: се чистат домовите и се подготвува празничната трпеза.
Навечер, околу полноќ, верниците се упатуваат кон храмовите, носејќи црвени јајца – симбол на животот и воскресението. Со свечениот тропар „Христос воскресе“, кој се пее трипати, се обиколува црквата, најавувајќи го доаѓањето на радосната вест.
По полноќната богослужба следи литургија, причест и традиционалното кршење со црвените јајца. Со тоа завршува постот и започнува празничната радост.
Посебен обичај е на малите деца во саботата навечер да им се става црвено јајце под перница, кое утредента, на Велигден, им се дава пред да заминат во црква – како благослов и симбол на нов почеток.
Велика Сабота нè потсетува дека и во најголемата тишина и темнина се раѓа надежта. Тоа е ден на исчекување – моментот кога светот мирува пред светлината на Воскресението.
Албански експерт: Без Албанците, Северна Македонија ќе се распадне за 24 часа
Ненадминливи Понуди Дневно
4.8 (10276 рецензии)
Заштедете 152.00 ден

