24 октомври 2025
• од Станча Јаќимовски
Лекарската комора одлучи дека поранешниот директор на Клиниката за неврологија, д-р Игор Кузмановски, ќе мора да помине тримесечна специјализирана обука со ментор и да полага испит пред да му биде продолжена лиценцата за работа.
Одлуката следи по скандалот што ја потресе јавноста, кога на социјалните мрежи се појави видео на кое се гледа како докторот меша бела прашкаста материја. По инцидентот, Кузмановски беше разрешен од функцијата директор на Клиниката.
Според соопштението од Лекарската комора, Комисијата за етички и правни прашања одлучила дека докторот ќе може повторно да ја добие лиценцата само ако успешно ја заврши обуката и го положи завршниот испит.
„По завршувањето на обуката, докторот ќе подлежи на испит за детална проверка на стручните знаења и способности. Со оглед на тоа што во моментот нема судска пресуда или друг правен акт кој би наложил одземање на лиценцата, Комората ја користи законската можност да воведе засилен механизам на контрола и едукација“, стои во соопштението.
Во Комората паралелно се води и сеопфатна постапка поврзана со етичкото однесување на докторот. Оттаму велат дека неговото однесување е јавно и остро осудено, бидејќи ги нарушува етичките принципи и угледот на лекарската професија.
„Комората даде јавна и остра морална осуда за однесувањето на докторот, јасно ставајќи до знаење дека со своето однесување тој ги крши етичките принципи и го нарушува интегритетот и угледот на лекарската професија,“ наведуваат од институцијата.
Комората исто така ги очекува извештаите од Министерството за здравство и Универзитетската клиника за неврологија, кои треба да дадат поширока слика за професионалниот лик и стручната способност на д-р Кузмановски.
Конечната одлука за неговата лиценца ќе биде донесена по темелна анализа на сите прибрани докази и извештаи.
Ненадминливи Понуди Дневно
4.8 (10276 рецензии)
Заштедете 152.00 ден

