Цената на кафето порасна за 60%: Луксузно задоволство сè помалку достапно за граѓаните

Во последните девет месеци, кафето бележи драстичен скок во цената од речиси 60%, правејќи го сè повеќе недостапно за многу граѓани. Според податоците на Trading Economics, од 5 август 2024 година до 29 април 2025 година, цената на кафето на меѓународните берзи е во постојан пораст, поставувајќи нови рекорди.

Главната причина за ова ценовно дивеење се лошите временски услови во Бразил – еден од водечките производители на кафе во светот. Недостатокот на стабилни климатски услови сериозно го намалува приносот, што пак ја зголемува цената на оваа популарна стока. Дополнително, слични проблеми се јавуваат и во Виетнам, уште една значајна земја во глобалната кафе-индустрија.

Светските компании за производство на кафе предупредуваат дека трендот на пораст на цените ќе продолжи и во наредните месеци. Единствените два фактори што можат да ја стабилизираат ситуацијата се добар принос од новите реколти во Бразил и Виетнам и стабилна рамнотежа меѓу понудата и побарувачката.

И покрај драстичното поскапување, македонските граѓани не се откажуваат од својата дневна доза кафе. „Колку и да поскапи, кафето е дел од нашето секојдневие“, велат многумина. Сепак, загриженоста расте, бидејќи сè повеќе производи стануваат луксуз, недостижни за просечниот потрошувач.

Експертите предвидуваат дека цените ќе продолжат да растат најмалку уште шест месеци, оставајќи малку простор за оптимизам и дополнително оптоварувајќи го семејниот буџет на многу домаќинства.