Берзата во Скопје се тресе: Овие компании тонеа за само три дена!

На македонската берза денеска се почувствува благо закрепнување, слично како и на пазарите во Азија, Европа и САД. И покрај умерениот оптимизам, скептицизмот сè уште преовладува меѓу инвеститорите, особено поради геополитичките тензии и глобалната трговска политика предводена од САД.

Некои компании, како што е Макстил, продолжуваат со пад. Производителот на метални елементи изгуби дополнителна вредност, што се припишува на влијанието од новите царини и ограничувања во трговијата, воведени од администрацијата на американскиот претседател Доналд Трамп. Според последните податоци, Макстил бележи пад од 13% во последните три трговски дена, почнувајќи од петокот, 4 април.

Слично негативно сценарио се одвива и кај некои од најголемите банки. Стопанска банка Скопје и Стопанска банка Битола изгубија околу 10% од својата вредност во истиот временски период. Овие бројки ја одразуваат зголемената несигурност на пазарот, особено во банкарскиот сектор.

И покрај ова, има компании кои покажуваат знаци на стабилност и кај кои инвеститорите очекуваат целосно закрепнување од падовите од минатата недела. Меѓу нив се компании од сектори кои се помалку погодени од глобалните трговски тензии.

Сепак, финансиските аналитичари предупредуваат дека натамошното движење на берзите, вклучително и Македонската, во голема мера ќе зависи од политиките на САД и дали ќе продолжи трговската војна на глобално ниво. Ако тензиите се продлабочат, негативните ефекти нема да бидат ограничени само на Скопје – светските берзи може да се соочат со нов бран на нестабилност.

Инвеститорите остануваат претпазливи, а пазарот – непредвидлив.