Анкета срам: Средношколци не знаат што се слави на 8 Септември, Македонија „граничела со Исток“

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Анкета срам: Средношколци не знаат што се слави на 8 Септември, Македонија „граничела со Исток“

31 јули 2025

• од Станча Јаќимовски

На улиците на Охрид, во еден наизглед обичен разговор со средношколци, се случи нешто што треба да го загрижи целото општество – децата не знаат што се слави на 8 Септември. Не знаат ни кога Македонија станала независна, со кои земји граничи, ниту пак колку зраци има државното знаме. Едноставно – ништо.

Во видео анкета што брзо се прошири по социјалните мрежи, младите одговараат со апсолутна збунетост:

„8 Септември… нешто за Македонија, ама не знам.“
„Граничи со… Исток, десно…“
„Зраци? Па 16:16…“
„8 Септември… тоа беше 8 Март?“

Анкетата не открива само незнаење. Таа е дијагноза. Децата не се само неинформирани – тие се изгубени во еден образовен систем кој очигледно не успева да ги научи ни најосновните работи. Зборуваме за млади што се на чекор до матурирање, а не знаат клучни датуми и факти од историјата и географијата на државата во која живеат.

Не е проблемот во нив – проблемот е во сите нас

Вината не е само во учениците. Вината е системска. Учебниците се стерилни, професорите демотивирани, а училиштата се повеќе стануваат институции каде се оди за присуство, а не за знаење. Ако на сето тоа се додаде влијанието на социјалните мрежи и дигитална зависност без критичко мислење, добиваме генерација која се информира од TikTok, а не од настава.

Впрочем, ваквите анкети само го документираат она што секој наставник во земјава го знае: децата не читаат, не слушаат, не учат. Не затоа што се „лоши“, туку затоа што никој не се потрудил навистина да ги заинтересира. А и зошто би им било важно кој празник се слави, кога прашањето што се учи – често нема никаква врска со реалниот живот?

Заклучок? Нема. Само срам.

Ова не е вест што треба да се сподели со смеа. Ова е предупредување. Ако образованието и понатаму остане формалност, ваквите анкети ќе станат новата нормала. А кога една држава има граѓани што не знаат основи – тогаш прашањето не е дали ќе потоне, туку кога.