25 ноември 2025
• од Станча Јаќимовски
Денешниот ден е посветен на Свети Јован Милостив, еден од најпознатите и најпочитуваните архиереи во историјата на Христовата црква, човек кој со својата кротост, добродетел и несебична љубов кон ближните оставил неизбришлива трага во православието.
Свети Јован е роден на островот Кипар, во угледно и кнежевско семејство. Од најрана возраст бил воспитуван во христијански дух и чесност. По желба на родителите се оженил и имал деца, но според Божјата промисла неговата сопруга и децата рано се упокоиле. Оваа тешка загуба не го одвратила од верата, напротив, уште повеќе го зацврстила во духовниот живот.
Неговата побожност и милосрдие биле добро познати, па така бил избран за патријарх Александриски во времето на цар Ираклиј. Десет години управувал со Александриската Црква како вистински духовен пастир, штитејќи ја од незнабошците и еретиците.
Свети Јован беше жив пример на кротост и милосрдие. За благородството честопати велел:
„Ако сакаш благородство, не барај го во крвта, туку во добродетелта, зашто тоа е вистинското благородство.“
Иако сите свети се одликуваат со милосрдие, Свети Јован бил особено посветен на оваа добродетел. Неговата љубов кон луѓето се покажувала и во најмалите моменти од секојдневието.
Еднаш, за време на Литургија, се сетил на Христовите зборови од Евангелието по Матеј (5, 23–24), дека оној што принесува дар пред жртвеникот треба најпрво да се помири со братот ако има несогласување. Сфативќи дека еден од клириците е зловолен кон него, патријархот ги оставил Светите Дарови и веднаш отишол да побара прошка. Дури по измирувањето се вратил пред жртвеникот — восхитувачки пример на смирение.
Другпат, на пат кон црквата на светите Кир и Јован, го запрела една бедна вдовица која долго се жалила за својата мака. Придружниците го потсетиле дека доцни за служба, но Свети Јован им одговорил:
„Како ќе ме послуша мене Бог ако јас не ја послушам нејзе?“
И не продолжил понатаму сè додека целосно не ја ислушал жената.
Кога Персијците нападнале на Египет, Свети Јован бил принуден да го напушти Александрија. Заминувајќи преку море, по пат се разболел. Својот земен живот го завршил во родниот Кипар, во 620 година.
Неговите чудотворни мошти низ вековите биле пренесувани на различни места: најпрво во Цариград, потоа во Будимпешта и конечно во Пресбург (денешна Братислава).
Ненадминливи Понуди Дневно
4.8 (10276 рецензии)
Заштедете 152.00 ден

