Литванија ја обвини Русија за експлозивни пратки во Европа

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

СВЕТ

Литванија ја обвини Русија за експлозивни пратки во Европа

18 септември 2025

• од Станча Јаќимовски

Литванските власти објавија дека серија детонации на пратки кои биле транспортирани низ Европа во 2024 година биле организирани од лица поврзани со руското воено разузнавање. Ова го соопштија главниот јавен обвинител на Литванија и криминалната полиција, пренесува „Ројтерс“.

Според безбедносните служби, пратките биле дел од руски заговор за експлозии на товарни летови кон САД. Во заедничкото соопштение се наведува дека во пакетите имало експлозивни направи со електронски тајмери, скриени во вибрирачки масажни перници. Како организатори се посочени украинскиот државјанин Даниил Громов, кој користел руски документи на име Јарослав Михајлов, и литванско-рускиот државјанин Томас Довган Стабачинскас.

Истите лица биле обвинети и за подметнување пожар во продавница на ИКЕА во Вилнус во 2024 година. „Утврдено е дека тие дејствувале организирано, со строга конспирација и поделба на задачите“, се наведува во изјавата.

Русија засега нема официјален одговор, а минатата година таа ги негираше обвинувањата за пожарот во ИКЕА и редовно ги отфрла ваквите западни тврдења како „русофобија“.

Европските влади и разузнавачки служби и претходно ја посочуваа Москва како можен извор на пожари и саботажи насочени кон дестабилизирање на сојузниците на Украина.

Детали од истрагата

Во истрагата биле откриени шест килограми експлозив, а обвиненија се поднесени против 15 лица – државјани на Русија, Литванија, Латвија, Естонија и Украина. Издадени се и меѓународни потерници за тројца мажи: Громов, Стабачинскас и рускиот државјанин Андреј Бабуров.

Четирите пакети биле испратени од Вилнус на 19 јули 2024 година. Еден од нив, испратен преку DHL, се запалил на аеродромот во Лајпциг, Германија, пред да биде натоварен во авион за Велика Британија. Вториот експлодирал на 21 јули во камион на DPD во Полска, а третиот – во магацин на DHL во Бирмингем, Англија, на 22 јули. Четвртиот пакет, исто така во камион на DPD во Полска, не се активирал поради дефект.

Организаторите, според властите, регрутирале луѓе преку апликацијата Telegram и им плаќале во криптовалута.