Поп осветува полициски возила на МВР

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Поп осветува полициски возила на МВР - граѓаните во шок

07 јануари 2026

• од Станча Јаќимовски

Фотографии од дворот на полицијата, на кои свештеници со амин и света вода ги „благословуваат“ полициските автомобили и мотори, предизвикаа оправдана реакција во јавноста. Новинарот Фуркан Салиу ги објави фотографиите од овој чин, јасно оценувајќи дека не станува збор за традиција, туку за директно кршење на принципот на секуларна држава.

Во дворот на државна безбедносна институција, врз службени возила што им припаѓаат на сите граѓани, се извршува верски обред. Не во црква. Не во приватен простор. Туку во институција што по дефиниција мора да биде неутрална. Полицијата во Македонија е мултиетничка и мултирелигиска и не смее да се идентификува со ниту една вера. Таа постои за да им служи на сите граѓани еднакво.

Кога една религија добива официјален простор во полицијата, пораката кон припадниците на другите вери – или кон оние што не се верници – е недвосмислена: оваа институција има доминантна вера. Тоа не е симболика. Тоа е институционализација на религијата и директно нарушување на Уставот, кој јасно ја дефинира државата како секуларна.

Државата се штити со закони, институции и професионализам – не со света вода. Ако денес службените возила ги „благословува“ свештеник, логично се поставува прашањето: што утре? Оџа? Рабин? Или само верата што е мнозинство? Секуларната држава не функционира врз основа на традиции, туку врз принципи на еднаквост и неутралност.

Ова не е првпат црквата да се меша во државни и јавни работи. Во време на пандемијата, свештеници, по налог на контроверзниот митрополит на Велешката епархија г. Агатангел, со камиончиња натоварени со буриња „света“ вода ги прскаа улиците во Кавадарци, Велес и други населби, обидувајќи се на тој начин да ја „избркаат“ короната. Тој чин наиде и на остри осуди и на потсмев кај граѓаните.

Сепак, денешното „бањање“ на полициските автомобили и мотори е уште посериозно. Станува збор за Министерството за внатрешни работи – една од клучните државни институции. Затоа, министерот Тошковски има обврска јавно да одговори: кој го дозволил овој чин и по која основа верски обред се извршува во дворот на полицијата?

Полицијата мора да биде институција на сите граѓани, а не продолжена рака на една вера. Сè друго е опасен преседан и директен удар врз секуларниот карактер на државата.